មជ្ឈមណ្ឌលជីវិតរស់នៅដោយឯករាជ្យនៃជនពិការភ្នំពេញ (PPCIL) បានចុះទៅ ធ្វើបទបង្ហាញនៅ វិទ្យាល័យ ហ៊ុនសែន ជម្ពូវ័ន្ត មានទីតាំងនៅភូមិសាមគ្គី សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ ក្នុងគោលបំណងផ្សព្វផ្សាយបញ្ហាពិការភាពទៅដល់ប្អូនៗ អោយបានយល់ដឹងពីពិការភាព។ ក្រុមការងារដែលចុះទៅធ្វើបទបង្ហាញមានដូចជា៖ លោក វ៉ែន រតនា កញ្ញា ជា បុប្ផា កញ្ញា គង់ ស្រី ញាណ(សុធារ៉ា) អ្នកនាង ឡៅ ម៉ាលីកា (ជាជំនួយការផ្ទាល់ខ្លួន ) ក្នុងនោះក៍មានប្អូនៗសិស្សានុសិស្សចំនួន ៦០នាក់ រៀនថ្នាក់ទី១០B ចូលរួមស្តាប់ការធ្វើបទបង្ហាញស្តីពី បញ្ហាពិការភាព ដោយយកចិត្តទុកដាក់។
ជាកិច្ចចាប់ផ្តើម លោក វ៉ែន រតនា បានសួរសុខទុកដល់ប្អូនៗដែលមានវត្តមាននៅទីនេះ លោក វ៉ែន រតនា បានសួរសំនួរទៅប្អូនៗដូចម្តេចដែលហៅថាពិការភាព? ប្អូនៗបានឆ្លើយថា ពិការភាពគឺជនទាំងឡាយណាដែរខ្វះខាតរឺបាត់បង់សរីរាង្គណាមួយ។ កញ្ញា ជា បុប្ផា បានសួរសំនួរទៅប្អូនៗតើកត្តាអ្វីខ្លះដែលបង្កអោយពួកគាត់ធ្លាក់ខ្លួនពិការ? ប្អូនៗបានឆ្លើយថា គឺមានកត្តាជាច្រើនដែលបង្កអោយពួកធ្លាក់ខ្លូនពិការ ដូចជា៖ គ្រោះថ្នាក់ចរាចរណ៍ គ្រោះថា្នក់ការងារ ខ្វះអាហាររូបត្ថម្ភ ពិការពីកំណើត ជំងឺតម្កាត់ គ្រោះថ្នាក់ដោយសារគ្រាប់មីន។ល។
កញ្ញា ជា បុប្ផា បានសួរបន្តទៀតថា តើពេលដែលជនមិនពិកាគាត់ធ្លាក់ខ្លួនពិការគាត់មានបញ្ហាអ្វីខ្លះសម្រាប់គាត់? ប្អូនៗបាន ឆ្លើយថា ពិបាករកស៊ីចិញ្ចឹមជីវិត ពិបាករកគូរស្រករ មិនសូវមានទំនាក់ទំនងជាមួយមជ្ឈដ្ឋានទូទៅ ពិបាកទៅផ្សារ សាលារៀន វត្តអារាម រឺទីប្រជុំជននានា ជាដើម។ កញ្ញា ជា បុប្ផា បានជំរាបប្រាប់ប្អូនៗថា សព្វថ្ងៃនេះមជ្ឈមណ្ឌល PPCIL ធ្វើការទៅលើជនពិការធ្ងន់ធ្ងរដែលគាត់មិនអាចធ្វើអ្វីបានដោយខ្លួនឯងបានទេគឺគាត់មានជំនួយការផ្ទាល់ខ្លួនជាអ្នកសម្រួលការរស់នៅប្រចាំថ្ងៃរបស់គាត់ដូចជា៖ការបំលាស់ទី ផ្លាស់ប្តូសម្លៀកបំពាក់ ចំអិនអាហារ និងការងារផ្សេងៗទៀត។
ហើយជនពិការគ្រប់រូបមានសិទ្ឋរស់នៅដោយស្មើភាពក្នុងសង្គមដូចជនមិនពិការដែរ។
លោក វ៉ែន រតនា បានពន្យល់ដល់ប្អូនៗថាទោះបីគាត់ពិការក៍គាត់នៅមានសមត្ថភាព អាចធ្វើការងារ ផ្សេងៗទៅតាមលក្ខណៈពិការរបស់គាត់ដូចជា៖ ជាងគំនូរ ជាងអេឡិចត្រូនិច
ម៉ាស្សា តន្ត្រី វាយកុំទ្យួទ័រ។ល។
ក្នុងឱកាសនោះកញ្ញា ជា បុប្ផា បានបង្ហាញរូបគំនូរគូរដោយមាត់របស់ជនពិការនៅប្រទេសតៃវ៉ាន់
ហើយនេះជាសមត្ថភាពពិតដែលគាត់អាចធ្វើបានល្អជាងមនុស្សដែលមានកាយសប្បទាគ្រប់គ្រាន់។
ជាចុងក្រោយលោក វ៉ែន រតនា បានសំណូមពរដល់ប្អូនៗ កុំអោយមានការរើសអើងមកលើជនពិការ
ត្រូវជួយលើកទឹកចិត្តដល់ពួកគាត់។
លោក វ៉ែងរតនា បានថ្លែងអំណរគុណដល់លោក នាយក វិទ្យាល័យ ហ៊ុនសែនជម្ពូវ័ន្តបានអនុញ្ញាត អោយ ក្រុមការងារមជ្ឈមណ្ឌលPPCIL មកធ្វើបទបង្ហាញស្តីពីបញ្ហាពិការភាព សូមជូនពរ លោកនាយក លោកគ្រូ អ្នកគ្រូប្អូនៗសិស្សានុសិស្សមាន សុខភាពល្អនិងរៀន អោយបានពូកែ គ្រប់ៗគ្នា។
លោកវ៉ែន រតនា កញ្ញា ជាបុប្ផា ធ្វើបទបង្ហាញស្តីពីបញ្ហាពិការភាព |
ប្អូនសិស្សានុសិស្សបានឡើងឆ្លើយសំនួរ |
ថតរូបជុំគ្នាទុកជាអនុស្សាវរីយ៍ |